Monthly Archives: 五月 2008

功能組別的歷史


香港立法機關的功能組別始於1985年,第一批的功能組別議席共有12席:

  1. 勞工界(兩席)
  2. 商界(一)
  3. 商界(二)
  4. 工業界(一)
  5. 工業界(二)
  6. 工程、建築、測量及都市規劃界
  7. 教學界
  8. 法律界
  9. 社會服務界
  10. 醫學界
  11. 金融界
到了1988年,增添了會計界和衞生界
1991年,功能組別議席增至21席。原有的「工程、建築、測量及都市規劃界」,被一分為二,成為「工程界」和「建築、測量及都市規劃界」兩個議席。另外,尚有以下新增組別:
  1. 地產及建造界
  2. 旅遊界
  3. 金融服務界
  4. 市政局
  5. 區域市政局
  6. 鄉議局
1995年,前港督彭定康推行政改方案,在功能組別開設「新九組」:
  1. 漁農、礦產、能源及建造界
  2. 紡織及製衣界
  3. 製造界
  4. 進出口界
  5. 批發及零售界
  6. 酒店及飲食界
  7. 運輸及通訊界
  8. 金融、保險、地產及商業服務界
  9. 公共、社會及個人服務界
回歸後,政改方案的新九組被臨立會推倒。另外,董建華廢除兩個市政局,於是兩個市政局的功能組別席位改由區議會代替,而勞工界亦增加一席。其他新增組別還包括:
  1. 漁農界
  2. 保險界
  3. 航運交通界
  4. 體育、演藝、文化及出版界
  5. 進出口界
  6. 紡織及製衣界
  7. 批發及零售界
  8. 資訊科技界
  9. 飲食界

 

中環價值的剛柔兩面


現在談龍應台創說的「中環價值」,未免晚了一點。不過,我覺得整個關於中環價值的論述和論戰,似乎遺漏了一些東西,有需要加以補充。

 

龍氏針對香港政商界強調發展至上的心態和經濟、城市規劃模式為中環價值,批評它缺乏人文關懷,犧牲居民的權益、街頭巷尾的社區歷史文化等等。此論在香港一石激起千重浪,引起不少人支持。適逢當時香港正值維港爭議之後,天星、皇后碼頭存廢未定之時,龍氏的中環價值論,成為反對中環進一步發展的人士提供了最佳的理論武器。記得,有一期《SEE》雜誌,就以「膨脹中環」來形容填海後的中環和各個即將以大商場+中產屋苑為核心的市區重建發展計劃。

 

不過,反中環價值者,又是否真的能擺離中環人的思維,以「廟街價值」、「西環價值」、「荃灣價值」或「聯和墟價值」來思想?

 

可惜,答案是否定的。因為反對者,其實也是大都來自中環,只不過他們不是大商家、發展商或政治領導階層, 而是律師、建築師、工程師、知識份子和文藝青年,簡而言之,bourgeois! 這批小資產階級主要的活動範圍,也是在中環及其周邊的CBD,只是他們的思想較接近西方的自由派,跟被批判中環價值(右派自由經濟學派),一柔一剛,一體兩面。

 

柔性的中環價值,在經濟發展模式上處處對剛性的中環價值針鋒相對,就似一個受慣大老闆氣的專業人士在工餘時咆哮一樣。無奈的是,他們卻又未能在剛性中環價值外,另立一套完整的思維體系。這在上次特首競選論壇時,曾梁的論辯最能表現出來。

 

柔性的中環價值,在經濟發展模式以外,又是否有所不同呢?小資產階級所追求的生活質素、清潔無煙的環境、優質教育,其實跟剛性中環價值觀信仰者無甚分別。記得前幾年 ,王晶在《黑馬王子》等電影和電視劇創作中,都以「廟街 vs 中環」作為相對的主軸,但小資產階級倡導的無煙城市,相信在廟街就不太受到歡迎。

小資產階級的勢利眼和階級歧視,跟他們所厭惡的大發展商,分別實在不大。這或許可以解釋,為何以小資為首的泛民領導,每一次港島區補選,只會挑律師和高官,對於學歷較低者(包括社工和中小學教師),總覺得不合流。

世代交替路遙遙


談起香港的世代交替問題,自然忍不住要批評嬰兒潮一代的前輩。

 

嬰兒潮一代,得天獨厚。出生時,避過戰亂,不用像他們的上一代般,歷盡劫難。在和平的環境成長,適逢六十年代尾七十年代初的左翼思潮,人人開明地全盤接受西方的價值觀,視之為普世的核心價值。出來工作時,又欣逢香港經濟起飛,幾乎個個都只需憑自己努力,事業就可以站穩了陣腳(毋須像他們的後輩般一開始就要經歷經濟衰退,個人如何努力也難以突破困局),三四十歲時有移民潮為他們上位騰出空間,到了五十六歲時,卻得力於科學昌明,仍然精神奕奕,不用像他們的上一代到了五十五歲已老態畢呈,巴不得立即退休。

 

可惜的是,他們雖然心裡支持西方的核心價值,但卻沒有學習西方的制度。加上社會經濟結構的轉變,三十和四十世代找不到向上流動的社會階梯,遂累積了不大不小的怨憤。這在政黨政治中最為明顯。其實這頗叫人遺憾,因為嬰兒潮一代雖然滿口普世價值,但他們在培育新人時,仍普遍採用其父輩的一套師徒制,沒有公開公平的機制選拔人才,後輩要上位,要不是得到上一輩的提攜,要不是另起爐灶希望可以殺出一條血路。

地水南音曲目《老舉問米》歌詞


《老舉問米》(又名《女燒衣》/《妓女痴情》)

 

主唱:杜煥

1975年,上環,富隆茶樓

 

歌詞內容:講述妓女楚英對身故恩客念念不忘,去找問米婆通靈覓愛郎蔣金良

斜體字 :揹仔字

():角色扮演

 

唱:

所謂男與女,呢一個情字每 ﹣每輕,

男人有義啦,所謂女亦有情。

今日係唱來人 ﹣人生一定㗎

當日呢,有個妓娘叫 ﹣叫做楚英。

皆因佢係交接有一個情郎真 ﹣真合心與性喎。

唉,誰知不幸呀佢箇個情郎早已喪陰靈。

使佢思量日夜啦,唉成咗單思病呀,

日來茶飯不思 ﹣總嘅唔聽。

人話啦,死後若想係再談情需愛問省呀,

待奴心事訴郎聽。

聞得喎有一個 ﹣一個問米婆,住响 ﹣住响我哋姨娘艇呀,

姐妹 ﹣姐妹人人話佢十 ﹣十分靈。

奴去問省呀,老娘瞞過啦,咁就去講真情。

 

哎吔我咁瞞 ﹣瞞過呢個養母呀。

(楚英):阿媽!

(養母):做乜嘢呀豬姆?

我去探姨娘

(養母):哎呀,咁你要早啲返嚟坐凳先至得㗎,你個衰鬼吓,呢排總 ﹣總唔接客,做乜傢伙?

唉,我帶淚含愁出外方

叫隻小舟呀搖我往

(艇家):呀,去邊處呀姑娘?

唉,咁你快些棹我呀過珠江

哎吔咁就艇嫂聞言將跳板放

(艇家):好聲行呀吓!

連忙相聚互過船艙。

不覺舟人忙打槳

呢個艇嫂把小舟棹佢地探姨娘。

不覺就到 ﹣就到舟 ﹣舟人停住槳呀。

(艇家):嚟到啦!

 

呀又到姨娘相接禮忙忙

茶煙奉過將言講呀

(姨娘):哎呀姨甥女!

乜你因何一陣呢係瘦得咁心傷?

究竟你呀有乜嘢 ﹣有乜嘢在身唔妥當呀

點解呀你瘦成 ﹣瘦成咁樣?你身為妓女懶梳粧

脂粉哎吔唔搽究竟整乜嘢戇呀又

我睇真容貌呀 ﹣呀姨甥女

(姨娘):甥女呀!

點解骨 ﹣骨瘦皮黃

 

唉,箇陣嬌答一聲

(楚英):姨母呀!

非別樣

(姨娘):做乜嘢呀?

我為憶呢個情郎命短,唉,使我日夜唔安

唉我茶飯呀都唔思,瘦成 ﹣瘦成咁樣咋

我今到此係探姨娘

 

一則係到來姨母你探訪呀

因為幾久我唔曾向你嚟問安

二另今日係到嚟艇上呀

我聞得你艇內呢,有一位係問米娘

姊妹嘅人人話佢靈就靈得妥呀 ﹣妥當呀

重話佢靈到十足事事嘅真裝

今日,唉到來非別樣呀

有請呢個問米婆,共我係請呀情郎

 

啊,箇陣姨母聽聞,哎吔真正混帳呀

(姨娘):乖女呀!

你們一定他日有個妓女牌坊

人話啦箇啲青樓喎,車歪咁樣㗎

若吔,原來我姨甥女你係咁情長

(姨娘):好啦!

咁我請過 ﹣請過問米婆,嚟到同女你講呀

(姨娘):你唔使喊!

等我立即喎,請佢 ﹣請佢出嚟相會,然後細說端詳

 

呀乖女咁你呢話名話姓住址何方

嬌答唉我個情郎生姓蔣呀

就係西 ﹣西關人氏,佢個名呀叫做金良 ﹣良 ﹣良

啊!米婆聽罷佢就將香上

(問米婆):你坐定呀吓,等我請嚟啦!

燒符唸咒喎在 ﹣在船艙

請到呀引魂童子即下降喎

請到係帶魂童 ﹣童子人你到壇場

請到枉死城將命放

請到街坊土地共城隍

好啦請罷一番米婆待喺神台上喎

自言 ﹣自言兼自講呀

見佢登時一陣係面帶青黃

 

好啦,忙舉步呀,落 ﹣落陰行

一心話尋搵嗰位姓蔣忙奔

沿路茫茫真 ﹣真惡搵㗎

米婆佢話落到去查問過晒箇啲地 ﹣地方神

係啦實便尋來皆唔見

唉呢個三娘五在着緊十分

不覺查到奈何橋忙接近呀

奈何橋上,好啦尋到箇個姓蔣亡魂

三娘將佢呢,將佢姓名問呀

問過死生時日呀都冇嘅差分

蔣亡便答,吓你何須將我問呀

乜你為何攔住待橋生

啊!米婆答話哩非別故嘅

因為壇中嚟咗你個有情人

昔日青樓煙花地

有個妓娘為你哩好情真

快些 ﹣快些將我近

等我帶你 ﹣帶你上壇相會你個舊知心

 

生到壇前求接近咯

又見 ﹣又見我哋知心旁立呀淚 ﹣淚紛紛

生就 ﹣生就把白米拎來在手上呀

連忙抛去妹衫襟

妹呀 ﹣妹呀,難得你咁 ﹣你咁有心來把我問呀

煙花場上算你第一個情深呀

妹呀海上嘅易求無價寶呀

娼寮難 ﹣難搵妹呀你咁有情人﹣人 ﹣人

唉,妹呀,可 ﹣可惜你咁有情有義煙花困

你早日 ﹣早日揀個多情男 ﹣男子呀共你 ﹣共你贖身

妹呀今生今世自問同你冇緣份

小生壽夭難以享受呀妹,妹呀你有情人

唉,妹呀,你早日別卻娼寮離花粉呀

你我係愛情休記恨

你早日唔使當娼為下等呀

願你青樓早日別風塵 ﹣塵 ﹣塵

 

唉,嬌聽罷喎,叫句 ﹣叫句情哥

哥呀,一心指望咯,你帶我脫災磨

唉,誰料薄命箇啲女人邊個似我

未得 ﹣未得哥呀埋街帶我,我就剋死了哥呀

哥呀,願你早日保祐我就離災禍呀

自從死後我食少愁多

今日請 ﹣請你上壇來講過

我但得 ﹣但得離災禍,我勢唔跟第個

我寧願齋台食素係永念 ﹣永念彌陀 ﹣陀 ﹣陀

 

唉,不怕蔣亡聽呀,叫句我哋妹粧前

妹呀,

(蔣金良):乜你咁呆呢?

你何食素係咁迷癡

唉想你竹葉 ﹣你竹葉咁青,

愁 ﹣愁冇安樂嘅日子咩

使乜齋堂食素去委尼 ﹣尼 ﹣尼

唉,陰陽隔別咁就難共你再親切呀

妹呀,唔能共你再效于飛

唉,總係妹呀,你有心來  ﹣來問,我就吩咐呀你

願你娼寮早日花粉呀別離 ﹣離 ﹣離

唉,妹呀總係 ﹣總係跟佬埋街呀,千祈咪話貪靚仔呀

千祈咪貪風月唔受迷癡

唉你顧住世人腹 ﹣腹有蜜,口有蜜言腹有劍

你還須記住箇啲巧語花言

唉,你千祈咪一時受了人家騙呀

願妹娼寮醒定好自為之

唉,虧我講不盡 ﹣講不盡世人心裡事呀

你從頭考過未至便宜

係啦講不盡 ﹣講不盡世人心裡事呀

妹呀,我時辰已夠返落陰司

 

嬌答一聲哥呀你唔 ﹣唔好去住呀

我有好多言 ﹣言語未講郎知

係啦陰魂一去咁就難 ﹣難留住

嬌嬌頓首淚呀如珠

咁佢長嘆一聲哥呀 ﹣哥呀忙氣死呀,跌在塵埃地呀

登時嬌姐氣到面轉黃泥 ﹣泥 ﹣泥

 

哎吔姨母嚇到係警慌唔少呀

連忙行近抱起這嬌姿

開聲連叫幾句姨甥女呀

(姨娘):阿姨甥女呀!

姨甥女,從容抖過啦聽我言詞

 

哎吔夫妻好極都係同林鳥咋

女呀難到來時各自飛

得快樂時應快樂噃

女呀!唔係到老方知恨悔遲

哎吔,你個情郎聲聲教你咯

叫你青樓早日見機

早日揀個係知心人帶你噃,勸女係毋需就記戀佢

責怪人世之中難免死㗎

即分來早係共來遲

(姨娘):哎吔阿乖女呀!

你姨母今年係六十都有呀四

週時搽吓粉蕩嘅胭脂

你個係姨丈咁就舊年歸逝去

七旬我都未做咋就快講佳期

 

(姨娘):哎吔!阿姨甥女!

你今年正話十九歲幾呀

而家係唔快樂問你等何時?

你想跟佬埋街就容乜易

姨娘共你揀個好相知

係啦,揀個有功名有面子

眉清目秀就好男兒

做大婆係啦唔做妾侍

以免日後畀人欺,兩家住埋包你到尾,早早三年生 ﹣生番兩個仔呀

箇陣安枕 ﹣安枕無憂

乖女呀,箇陣白髮齊眉。

紀錄片《失明人杜煥憶往》


嚴格來說,《失明人杜煥憶往》似是一段聲帶多於一齣紀錄片。1975年,美國匹茲堡大學音樂系教授榮鴻曾邀請地水南音瞽師杜煥在上環富隆茶樓演唱南音歌曲,並且即場錄音。《失明人杜煥憶往》是南音宗師杜煥當時即興創作,唱出他一生坎坷的遭遇。現在,康文署、歷史博物館和港大音樂系,合作在聲帶上加插各方南音研究人員和愛好者的訪問片段,成為一齣珍貴的南音紀錄片。

杜煥是地水南音最後一名全職南音瞽師,1979年他仙遊後,地水南音這種一度活躍於省港兩地的說唱絕活,變成絕唱,只有部份神韻託寄在戲台南音中殘存。杜的聲音,我覺得有些似阿葛,但滄桑味重。〈失明人杜煥憶往〉固然精采,但〈老舉問米〉更加厲害,杜在此曲中,一人分飾年輕妓女、阿嬸、艇家、問米婆,難得個個角色都扮得維肖維妙,簡直爐火純清。

俱往矣,南音生存的經濟背景、環境背景都蕩然無存,幸好還有少量錄音存世,讓這種廣東人的技藝得以保存下來。